БИШКЕК, 28-июл. — Sputnik. Август айы былтыркыга салыштырмалуу ысык болорун Кыргызгидрометтин метеорология бөлүмү билдирди.
Синоптиктердин айтмында, абанын температурасы нормадан 1-2 градус ысык болуп, орточо ысыктык 23-25 градус болот.
"Айдын башында аптаптуу аба ырайы сакталып, түнкүсүн 20, күндүз 37 градуска чейин жетет. Ошондой эле эң жогорку температура 40,5 градуска чейин ысыйт. Акыркы жолу мындай ысык 1997-жылы 16-августта катталган", — деп айтылат маалыматта.
Августтун экинчи жана үчүнчү декадасында аба ырайы түнкүсүн 16 градус, күндүз 35 градуска чейин ысыйт.
Жайдын акыркы айында былтыркыга караганда жаан-чачын да аз болот.
